Эдийн засгийн өөрчлөлт
Өнгөрсөн зууны хугацаанд эмэгтэйчүүдийн нийгэм дэх үүрэг ахуйн хөдөлмөр эрхлэх хэв маягаас эдийн засгийн идэвхтэй оролцогч болж эрс өөрчлөгдсөн. Боловсролын болон хөдөлмөр эрхлэлтийн боломж нэмэгдсэнээр эмэгтэйчүүдийн орлогын түвшин өсөж худалдан авалтын шийдвэр гаргалтад өндөр нөлөөтэй оролцох болсон. Харин энэ өөрчлөлт дэлхийн хэрэглээний бүтэц, зах зээлийн чиг хандлагад суурь нөлөө үзүүлсээр байна.

Худалдан авалтын гол шийдвэр гаргагчид
Судалгаагаар эмэгтэйчүүд дэлхийн нийт худалдан авалтын 70–80%-д нөлөө үзүүлдэг. Тэдний нөлөө нь зөвхөн өрхийн хэрэглээгээр хязгаарлагддаггүй бөгөөд санхүү, эрүүл мэнд, технологи, автомашины салбарт ч өргөжсөөр байна. NielsenIQ /Дэлхийн зах зээл судалгаа, хэрэглэгчийн зан төлөвийн дата шинжилгээний компани/-ийн тооцооллоор эмэгтэйчүүд ойролцоогоор жилд 31.8 их наяд ам.долларын хэрэглээний зардлыг хянадаг. Энэ нь тэднийг дэлхийн эдийн засгийн том хүчний нэг болгож байгаа бөгөөд энэ  нөлөө нь компаниудын бүтээгдэхүүн хөгжүүлэлт болон зах зээлийн байршуулалтын стратегид өөрчлөлт авчирсаар байна.

FMCG салбар дахь нөлөө
FMCG салбарт эмэгтэйчүүд хүнс, ус ундаа, хувийн арчилгаа, ахуйн хэрэглээний бүтээгдэхүүний худалдан авалтын гол шийдвэр гаргагчид байдаг. Тэдний сонголт бүтээгдэхүүний шинэчлэл, сав баглаа боодол, үнийн стратегид шууд нөлөөлдөг. Иймээс ч эмэгтэй хэрэглэгчдийн хүлээлтэд нийцсэн брэндүүд илүү өндөр өсөлт үзүүлэх хандлагатай байдаг тул тэдний хэрэглээний зан төлөвийг ойлгох нь FMCG салбарын стратегийн үндсэн шаардлага болж байна.

Үнэт зүйлд суурилсан хэрэглээний өсөлт
Судалгаагаар эмэгтэйчүүд худалдан авалт хийхдээ тогтвортой байдал, ёс зүйтэй үйлдвэрлэл, брэндийн үнэнч байдалд илүү ач холбогдол өгдөг. Энэ нь байгальд ээлтэй сав баглаа боодол, ил тод нийлүүлэлтийн сүлжээний эрэлтийг нэмэгдүүлсэн. Ёс зүйтэй, нийгмийн хариуцлагатай брэндүүд эмэгтэй хэрэглэгчдээс илүү өндөр үнэлгээ авдаг. Үнэт зүйлд суурилсан хэрэглээ нь урт хугацаанд брэндийн байр суурийг тодорхойлж байна.

Маркетинг ба брэндийн өөрчлөлт
Эмэгтэйчүүдийн эдийн засгийн нөлөө өсөхийн хэрээр маркетингийн стратеги өөрчлөгдсөөр байна. Уламжлалт хэвшмэл дүрслэлээс татгалзаж, хүчирхэг байдал, олон талт байдал, бодит байдлыг онцлох хандлага нэмэгдсээр байна. Жинхэнэ байдал болон, ялгаваргүй байдлыг харуулсан контент бүхий кампанит ажил илүү өндөр хэрэглэгчийн итгэл, оролцоог бий болгож байна. Энэхүү хувьсал нь брэндүүд орчин үеийн нийгмийн үнэт зүйлстэй нийцэх ёстой гэсэн өсөн нэмэгдэж буй хүлээлтийг илэрхийлж байгаа юм.

Манлайлал ба бизнесийн гүйцэтгэлд эмэгтэйчүүд
Эмэгтэйчүүдийн удирдах албан тушаал дахь оролцоо нэмэгдэх нь бизнесийн гүйцэтгэлд эерэг нөлөөтэй. McKinsey-ийн судалгаагаар удирдах албан тушаалд жендерийн тэгш байдал өндөртэй компаниуд санхүүгийн үзүүлэлтээр илүү амжилттай байх магадлалтай байдаг байна. Мөн эмэгтэйчүүд цахим худалдаа, эрүүл мэнд - сайн сайхан байдал, хэрэглээний бараа бүтээгдэхүүний салбарт идэвхтэй бизнес эрхэлж байна. Энэхүү манлайлал нь бүтээгдэхүүний инновац болон байгууллагын соёлд өөрчлөлт авчирч байна.

Дүгнэлт
Эмэгтэйчүүд хөдөлмөр эрхлэлт, худалдан авах шийдвэрийн нөлөө, удирдлагын оролцоогоор дамжуулан зах зээлийг өөрчилсөн. Тэдний нөлөөгөөр бүтээгдэхүүн хөгжүүлэлт, маркетингийн стратеги, компанийн бодлого өөрчлөгдөж байна. FMCG салбарт эмэгтэй хэрэглэгчийн зан төлөвийг ойлгох нь нэмэлт давуу тал бус бизнес өсөлтийн суурь хүчин зүйл юм.